Heil vika síðan síðast!

Heil vika síðan ég skrifaði síðast! Hvað hefur gerst síðan þá??

Eldhúsið er svotil tilbúið. Það var klárað að leggja gólfið í síðustu viku og það er alveg frábærlega flott. Flísarnar líta út eins og ljósleitur marmari og inn á milli er viðarlíki sem er eins og viðurinn í skápahurðunum. Það eina sem við eigum eftir að gera er að mála veggina. Við erum ekki búin að finna litinn en það hlítur að koma að því. Það eina sem er að angra okkur er þvottavélin. Stundum þegar hún er að vinda þá hristist hún svo mikið að hurðin sem er framaná opnast og lokast með skellum. Við höfum verið að kvarta og það eru karlar búnir að koma og skoða en allt virðist vera í lagi. Hurðini er haldið aftur með segulstáli og þeir ætla að senda okkur annan segul. Kanski það virki en við erum ekkert alltof ánægð.

Snjórinn sem við fengum í lok síðustu viku var horfinn eftir tvo daga en það lömuðust allar samgöngur. Ég fór á skrifstofuna í Coventry á föstudaginn og seinnipartinn fór að snjóa aðeins meira. Ekkert mikið en hitinn fór niður í frostmark þannig að krapið á götunum fór að frjósa og það var svakalega seinlegt að komast heim. Sérstaklega á minni götunum þar sem voru brekkur. Þar voru langar biðraðir og allt gekk voðalega hægt. Svo fór allt að hlýna og það hefur verið 10 stiga hiti og fínt veður alla síðustu viku.

Krakkarnir eru búir að vera í hálfannarfríi þessa vikuna en fara aftur í skólan á mánudaginn. Þau eru búin að fara í ten pin bowling og bíó og hitta vini sína. Bara gaman hjá þeim.

Við Alison fórum út að borða á degi heilags Valentínusar sem var indælt. Við fórum á indverskan veitingastað í Henley. Daginn eftir, 15. feb, kom Ron tengdapabbi í mat til okkar en hann átti afmæli þá. Sami dagur og Boggs systir; til hamingju með daginn Bogga!

Ég hef ekki þurft að vera í Manchester en hef verið í skrifstofu okkar í Coventry. Það er ekki hægt að vinna heima þegar krakkarnir eru þar líka. Það er endalaust ónæði. Ég býst þó við að vera í Manchester mestalla næstu viku.

Nýtt lyf gegn krabbameini?

Ég var að lesa grein á New Scientist sem segir frá nýju lyfi sem virðist ráða við flestar tegundir af krabbameini.

Væri það ekki frábært ef þetta væri lausnin gegn krabbameini?

Þeir spáðu rétt

Spáin var rétt og það er kominn snjór, 5-7 cm, og það á víst að snjóa í allan dag. Skólarnir eru lokaðir, þannig að Lindsey er ánægð, og krakkarnir eru úti að leika sér. Þau fóru út í morgun og ég hef ekki séð þau síðan en ég held þau eru einhverstaðar í nágreninu að leika sér með öðrum krökkum. Alison á að vera að vinna í dag en hefur ekki lagt í það að keyra þangað. Það lamast allar samgöngur í þessu landi þegar það snjóar. Ég ætlaði að vera í Manchester í dag en hætti við það þegar ég sá snjóinn í morgun og er bara heima að vinna, sem er náttúrulega miklu betra.

Það er verið að leggja flísarnar á gólfið í eldhúsinu í dag og það lítur bara vel út.

Þeir spá snjó

Veðurkarlarnir eru að spá snjó í nótt. Það er búið að vera gullfallegt veður í dag, heiðskýrt, stillt, og kalt. Það var sjö eða átta stiga frost í morgun og það var alveg frábært að keyra til Bracknell á meðan sólin var að koma sér uppfyrir sjóndeildahringinn. Öðru hverju keyrði maður í gegnum frostþoku og þá sást ekkert til sólar og allt var í myrkri en svo þegar maður var að komast í gegn þá gerði sólroðinn alla þokuna eldrauða, eins og allt væri í einu báli. Frábært! Og svo var allt hulið í hrími eins og á póstkorti. Ég var að óska þess að ég hefði myndavélina með mér, og tíma til að stoppa og taka myndir.

Kennararnir í skólanum hanns Hávars eru svo vissir að það verður ófært í skólann að það er búið að tilkynna að það verður enginn skóli á morgun. Eitthvað held ég að Lindsey verði fúl ef það verður skóli hjá henni en ekki stóra bróður.

Flísar

Það var byrjað að flísaleggja veggina í eldhúsinu í dag og verður klárað á morgun. Þetta er allt að verða tilbúið. Við ætluðum að mála veggina á helginni en það miklu erfiðara en við héldum að velja lit á þá. Þessi litakort eru með helling af litum til að velja en þegar maður er búinn að velja litinn og kaupir einn prufupot þá er liturinn allt öðruvísi en á kortinu þannig að við urðum að gefast up.

Það var þetta fína veður í gær og þegar við höfðum gefist um með að finna málningu þá fórum við í hjólreiðartúr með Lindsey. Hávar var ekki heima. Hann fór út um morguninn með félögum úr skátunum í gönguferð. Þeir eru að æfa sig fyrir langa göngu í Dovedale.

Áður en dagurinn endaði ákvað ég að slá garðblettinn. Hann var orðinn heldur loðinn og ég var heldur ekki einn í því að slá. Margir aðrir í götunni gerðu það sama. Ótrúlegt veður fyrir Febrúar.

Heitur Janúar

Venjulega er Janúar kaldur og nöturlegur en ekki í ár. Þetta er víst einn af þeim heitari sem hefur komið í langan tíma, ef marka má fréttir, þó að það hafi oft verið rigning og rok. Það eru breiður af túlípönum farnar að birtast og um daginn sáum við Alison fiðrildi flögra fyrir utan eldhúsgluggan okkar. Þetta er ekki eðlilegt.

Hávar veikur

Hávar er búinn að vera veikur heima síðustu þrjá daga. Þetta byrjaði með magaverk og svo bakverk. Alison fór með hann til læknis sem giskaði á að þetta gæti verið lítill nýrnasteinn. En hann var orðinn góður í morgun og fór í skólann. Lindsey er auðvitað voða fúl yfir því að stóri bróðir hafi fegið þriggja daga frí frá skólanum.

Það hefur ekkert gerst í eldhúsinu þessa vikuna. Það átti að flísaleggja veggina á mánudaginn en flísarnar voru pantaðar en komu ekki. Þær eiga að vera komnar núna og planið er að byrja á mánudaginn í næstu viku. Og á miðvikudaginn á að leggja Amtico flísar á gólfið. Þegar það er búið eigum við bara eftir að velja málningu á veggina.

Ég er heima í dag. Bíllinn er á verkstæði í sinni fyrstu skoðun.

Við höfum verið að fylgjast með fimm þátta spennumynd á BBC sem heitir "Five Days" og maður hefur verið að heyra í Björk syngja á Íslensku. Þetta var alveg ágæt þáttaröð þó að stundum hafi okkur fundist að við hafa mist af einhverju, eitthvað gerðist og við föttuðum ekki samhengið.